Мэдээллийн технологийн орчинд маш олон төрлийн сүлжээ ашиглагддаг. Үүнд эртний сериал холболтоос эхлээд шилэн кабел, WiFi утасгүй сүлжээ, үүрэн холбооны сүлжээ гэх мэтээр нэрлэж болно. Эдгээр сүлжээнүүд физик түвшиндээ мэдээж хоорондоо ялгаатай байдаг, зарим тохиолдолд протокол түвшиндээ ч ялгаатай байх нь бий.
Цаг хугацааны явцад интернэт сүлжээний TCP/IP, UDP гэсэн багц протоколууд стандарт болон давамгайлж байна. Жишээлбэл Bluetooth төхөөрөмж физик түвшиндээ өөр боловч протоколын түвшиндээ IP багцыг ашиглаж бусад төхөөрөмжүүдтэй ойлголцож чаддаг. Мөн үүнтэй төстэйгээр үүрэн холбооны 4G технологи нь IP протоколын багцыг ашигладаг болсон.
Энэ бүлэгт сүлжээний үндсэн протоколуудын тухай, Go хэл дээр хэрхэн сүлжээний програм бичих тухай үзнэ.